NAIJA BOOK 'TORI'

MONDAYS 2PM

Today on top Naija book tori, na anoda book wey go burst una head naim I bring come. The title na "fine boys" and na Eghosa Imasuen write am.

This book give us berekete tori about one military era for we country naija and how e take affect four small small boys wey be friends.

Them just gain admission for university and the military regime that time come affect their lives. The way the writer write the book naim be the ogbonge gist and na until you read am you go know.

Na so we see am on top dis week post, una do well say una take una time read, abeg make una no forget to comment for the small box wey dey down.

na me una geh, madam NBT....e go be

NAIJA BOOK 'TORI'

MONDAYS 2PM

Una welcome on top this correct blog post:  Naija Book Tori. This na the place wey I go dey give you all the ogbonge tori about books for we country - Nigeria.

Kiakia to the tori of today; na one Lagos book wey oyinbo dey call 'Comedy' naim dey my plate today. No be only that o, the book carry correct sense and we fit learn inside wella. Na our own Lola Shoneyin write am, the name? "secret lives of Baba Segi's wives' This one mean say the kurukere/hide hide life wey baba segi wives dey live.

For me o, this book go fit be the only correct book wey naija go ever make because this book torchlight many bad bad tins wey dey shele for we family and we no dey free talk am come outside like rape, and plenty wives wahala. As I talk before, the book na comedy, but you go still learn sontin. Na here we go end today tori o, as usual make you leave your comment for down....na me Una geh, madam NBT e go be.

NAIJA BOOK 'TORI'

MONDAYS 2PM

My country people, How una dey? How una take do the Democracy Day? Me na inside the book wey I wan tell you today wey I dey do my own. Meaning say another week don pass and we thank baba God say we dey alive.

You know say book matter dey always totori my bele - 😁😁😁. Oya make we enter the matter, kia kia.

Today ontop Naija Book Tori na the gist of one correct book wey I never see the type before naim I bring come o.  The book name na "A Woman's Pot, A Man's Stomach' - see title.

Make I translate, 'Woman pot, Man bele'; this book no be one person write am o (me self I join inside) naim oyinbo dey call anthology. Na members of Nigerian Writers Colony - NiWco - colabo write am and our chairlady Sandra .T. Adeyeye inspect am for everybody jollification.

This book contain poems wey dey yarn about all the orisirisi food wey dey we obodo naija and even other of our brothers or sisters type of food in the abroad. For inside this book, you go see food like Amala and gbegiri, pandi to jellof rice and even moimoi. Hmmmm, na food we take write poem o my people. Atink, I tell you say na ogbonge book!

I like this book sake of say na different food pesin go see inside and the writers dem write am for way wey go make you know how dem take dey cook the food and where the food come from. Infact, if you read this book finish, na better hungry go catch you.

The book dey different eBook stores. You go fit read am online or download am enter your device. You know the part wey dey burst my brian? Na FOC, my people, Free Of Charge - wetin you dey wait for?

Make I leave you go see the food wey I wan cook today from 'A woman's pot, A man's stomach'. Until next week wey we go meet. Na me una geh, Madam NBT... e go be!

NAIJA BOOK TORI

'MAK UNA SEND YOUR OWN TORI' EVERY MONDAY

Una welecome to another week ontop Naija Book Tori!
How we dey? Hope body dey kampe and we no get any transmission walaha?

Oya Kia-kia make we enter the matter proper. For today tori, na another ogbonge book I bring come Una domot. The name na 'Our Son The Minister' and na Paul Ugbede write am.

The book na drama wey actors for details act ontop stage Oyinbo call am 'Play'. Okay so this play come yarn us about one man why him name names Dr. Makoji Ejembi. Him family want make him be minister of something for we country by force by fire. (No be say dem don give am d chaimo title o). Him family just carry the matter put for head like Korede Bello - jerry coil come dry use am dry worry them pikin. Na all dis na im vex Dr Makoji wey make am say lailai him no dey do.

The writer put plenty sweet sweet thing inside dis soup wey him cook; sake of say to torchlight all  the yanma-yanma thing dem wey dey happen for we naija politics - na im make am for write this book.

I like the book because of the way him use orisirisi people (for book talk we dey call them Characters) take show us wetin dey shele for our own ibile inside obodo naija.
People like the fake juju man, the lovey lovey pastor, the head doctor wey no know anything wey him dey do. The book na play wey dey mock the way wey we dey do politics for we country wey oyinbo dey call 'Satire' and the play go make person laf tire.

Na so we go see am reach on top Naija Book Tori for today; I hope say dis tori sweet you reach belle and e go beleful you reach next week wey I go bring another gist cook give you.

Na me, your geh madam NBT... e go be! 

NAIJA BOOK TORI

My country pipu, this week ontop Naija Book Tori, the number one book program ontop NiWco street na one ogbonge book wey I just read. Naim I say make I  bring the gist come your domot abi na phone screen.

The title na "29, single and Nigerian" wey NaijaSinglegirl write.

This book na book wey go make person laugh tire. The writer talk about one geh wey her name be Edikan; she dey find man wey make sense and him must get beta work and plenty money for pocket plus other orisirisi wey life fit give man pikin; but with the whole katakata wey dey we naija e b like say e go hard small for am.

D book no be true true e happen sha; na the type wey oyinbo dey call fiction. D book na wetin most gehs for obodo naija fit understand sake of say we don pass through that kain thing before or we go still pass am.

If you ask me I go teh you say the book make me to know say e no easy to be single geh wey no get money for this we country. Wetin man eyes don see no be small, na until you read dis book you go understand.

I like the way the Naijasinglegirl take torchlight some areas wey single gehs dem dey face for we country naija.

Sake of say geh single, to look for work to do go be "back for ground, work for office'; this na the many many tins wey single gehs dey face so, for we country naija - e no easy.

The way the writer use play play talk true about everything naim dey burst my head about the book and the reason wey make me choose the book na sake of say im title talk about naija and this na Naija Book Tori.

So my pipu, na here we go end this week tori ontop Naija Book Tori. I hope you beleful for this gist wey I bring today?

Make you no forget to teh me wetin you think of this my gist today for the space for down. Na your geh, madam NBT.

E go be!